ತಾಯಿ ಚೆನ್ನಮ್ಮನನ್ನು ನೆನೆದು ಹೆಚ್ಡಿ ದೇವೇಗೌಡ ಪುತ್ರಿಯರು ಭಾವುಕರಾಗಿ ಹೇಳಿದ್ದೇನು?
‘ಅಮ್ಮನ ಜೀವನದ ಏಕೈಕ ಆಸೆ ಒಂದು ಚಿಕ್ಕ ಮನೆ’: ತಾಯಿ ಚೆನ್ನಮ್ಮ ಅವರನ್ನು ಸ್ಮರಿಸಿ ಭಾವುಕರಾದ ದೇವೇಗೌಡ ಪುತ್ರಿ ಶೈಲಜಾ!
LATEST NEWSಬೆಂಗಳೂರು
S3 Media House
7/24/20261 min read
ಬೆಂಗಳೂರು: ಮಾಜಿ ಪ್ರಧಾನಿ ಎಚ್.ಡಿ. ದೇವೇಗೌಡ ಅವರ ಪತ್ನಿ ಚೆನ್ನಮ್ಮ ಅವರ ಬದುಕಿನ ಸರಳತೆ, ತ್ಯಾಗ, ಸಂಸ್ಕಾರ ಮತ್ತು ಕುಟುಂಬದ ಮೇಲಿನ ಪ್ರೀತಿಯನ್ನು ಸ್ಮರಿಸಿಕೊಂಡು ಪುತ್ರಿ ಶೈಲಜಾ ಭಾವುಕರಾಗಿ ಮಾತನಾಡಿದರು. ತಾಯಿ ಜೀವನದಲ್ಲಿ ಎಂದಿಗೂ ವೈಭವವನ್ನು ಬಯಸಲಿಲ್ಲ. "ಒಂದು ಚಿಕ್ಕ ಮನೆ" ಮಾತ್ರ ಅವರ ಜೀವಿತದ ಏಕೈಕ ಆಸೆಯಾಗಿತ್ತು ಎಂದು ಅವರು ನೆನಪಿಸಿಕೊಂಡರು.
ಶೈಲಜಾ ಅವರ ಪ್ರಕಾರ, ದೇವೇಗೌಡ ಮತ್ತು ಚೆನ್ನಮ್ಮ ಅವರ ವೈವಾಹಿಕ ಜೀವನ ಬಾಡಿಗೆ ಮನೆಯಿಂದಲೇ ಆರಂಭವಾಗಿತ್ತು. ತಾವು ಹುಟ್ಟುವ ವೇಳೆಗೆ ದೇವೇಗೌಡ ಶಾಸಕರಾಗಿದ್ದರೂ, ಜೀವನದಲ್ಲಿ ಯಾವುದೇ ಆಡಂಬರ ಇರಲಿಲ್ಲ. ನಂತರ ಲೋಕೋಪಯೋಗಿ ಸಚಿವರಾಗಿದ್ದ ಸಂದರ್ಭದಲ್ಲಿ ಸರ್ಕಾರದ ನಿವಾಸ ದೊರೆತಿದ್ದರೂ, ಆ ನಿವಾಸವನ್ನು ಖಾಲಿ ಮಾಡಿ ಮತ್ತೆ ಬಾಡಿಗೆ ಮನೆಗೆ ಹೋಗುವ ನಿರ್ಧಾರವನ್ನು ತಂದೆ-ತಾಯಿ ಕೈಗೊಂಡಿದ್ದರು ಎಂದು ಹೇಳಿದರು.
ಆ ವೇಳೆ ಸಮೀಪದಲ್ಲೇ ಬಾಡಿಗೆ ಮನೆ ಹುಡುಕಲು ಹೋದಾಗ, "ಪ್ರಧಾನಿ ಅವರ ಪತ್ನಿಯೇ ಬಾಡಿಗೆ ಮನೆಗೆ ಬರುತ್ತಾರಾ?" ಎಂದು ಮನೆ ಮಾಲೀಕರು ಆಶ್ಚರ್ಯ ವ್ಯಕ್ತಪಡಿಸಿದ್ದರು. ಮನೆ ನೀಡಲು ಹಿಂದೇಟು ಹಾಕಿದ್ದಲ್ಲದೆ, ರಾಜಕೀಯ ಉದ್ದೇಶವೇನಾದರೂ ಇದೆಯೇ ಎಂಬ ಅನುಮಾನದಿಂದ ಸಾಕಷ್ಟು ಪ್ರಶ್ನೆಗಳನ್ನು ಕೇಳಿದ್ದರು ಎಂದು ಶೈಲಜಾ ನೆನಪಿಸಿಕೊಂಡರು.
ತಾಯಿ ಚೆನ್ನಮ್ಮ ಅವರಿಗೆ ತಮ್ಮದೇ ಆದ ಒಂದು ಪುಟ್ಟ ಮನೆ ಬೇಕೆಂಬ ಆಸೆ ಇತ್ತು. ಊಟದ ವೇಳೆ ಈ ವಿಚಾರವನ್ನು ಪ್ರಸ್ತಾಪಿಸಿದಾಗ, ದೇವೇಗೌಡ ಅವರು "ಆಕಾಶ ತೋರಿಸಿ, ಅಲ್ಲಿದೆ ನಮ್ಮ ಮನೆ" ಎಂದು ಹಾಸ್ಯಮಯವಾಗಿ ಹಾಡು ಹೇಳುತ್ತಿದ್ದರು ಎಂದು ಅವರು ಸ್ಮರಿಸಿದರು. ಹೀಗೆ ಎರಡು-ಮೂರು ವರ್ಷಗಳು ಕಳೆದರೂ ಮನೆ ನಿರ್ಮಾಣ ಸಾಧ್ಯವಾಗಿರಲಿಲ್ಲ.
ಸುಮಾರು ಆರು ತಿಂಗಳ ಬಳಿಕ ಕುಟುಂಬದಲ್ಲಿ ನಡೆದ ಕೆಲವು ಕಹಿ ಘಟನೆಗಳ ನಂತರ, ತಾಯಿ ಮತ್ತೊಮ್ಮೆ ತಮ್ಮ ಆಸೆಯನ್ನು ವ್ಯಕ್ತಪಡಿಸಿದ್ದರು. "ಹಕ್ಕಿಯೂ ತನ್ನ ಗೂಡು ಕಟ್ಟಿಕೊಳ್ಳುತ್ತದೆ. ನನಗೂ ಒಂದು ಸಣ್ಣ ಮನೆ ಬೇಕು. ಅದೊಂದನ್ನಾದರೂ ನೆರವೇರಿಸಿ" ಎಂದು ಮಕ್ಕಳ ಬಳಿ ಕೇಳಿಕೊಂಡಿದ್ದರು ಎಂದು ಶೈಲಜಾ ಭಾವುಕರಾಗಿ ಹೇಳಿದರು.
ತಾಯಿಯ ಆಸೆಯನ್ನು ಈಡೇರಿಸುವ ಉದ್ದೇಶದಿಂದ ಆರು ಮಂದಿ ಮಕ್ಕಳು ಸೇರಿ ಬ್ಯಾಂಕ್ನಿಂದ ಸಾಲ ಪಡೆದು ಮನೆ ನಿರ್ಮಿಸಿದರು. ಆ ಮನೆಯಲ್ಲಿ ಚೆನ್ನಮ್ಮ ಅವರು ಸುಮಾರು ಐದು ವರ್ಷಗಳ ಕಾಲ ಅತ್ಯಂತ ಸಂತೋಷದಿಂದ, ಪುಟ್ಟ ಮಗುವಿನಂತೆ ಸಂಭ್ರಮದಿಂದ ವಾಸ ಮಾಡಿದ್ದರು. ನಂತರ ಮತ್ತೆ ಕುಟುಂಬದ ಕಾರಣಗಳಿಂದ ಅವರನ್ನು ಹಳೆಯ ಮನೆಗೆ ಕರೆತರಲಾಯಿತು ಎಂದು ಹೇಳಿದರು.
ಕುಟುಂಬದ ಸಂಸ್ಕಾರ ಮತ್ತು ಮೌಲ್ಯಗಳನ್ನು ಕಾಪಾಡುವಲ್ಲಿ ತಾಯಿ ಮಹತ್ವದ ಪಾತ್ರ ವಹಿಸಿದ್ದರು. ಇಂದಿನ ದಿನಗಳಲ್ಲಿ ಕುಟುಂಬದ ನೆಮ್ಮದಿಯನ್ನು ಹಾಳು ಮಾಡುವಂತಹ ಬೆಳವಣಿಗೆಗಳು ನಡೆಯುತ್ತಿರುವುದು ನೋವು ತಂದಿದೆ. ಆದರೆ ಚೆನ್ನಮ್ಮ ಅವರು ತಮ್ಮ ಜೀವನದುದ್ದಕ್ಕೂ ಕುಟುಂಬವನ್ನು ಒಗ್ಗೂಡಿಸಿಕೊಂಡು ಬಂದಿದ್ದರು ಎಂದು ಶೈಲಜಾ ಹೇಳಿದರು.
ತಾಯಿ ಎಂದಿಗೂ ರಾಜಕೀಯ ವಿಷಯಗಳಲ್ಲಿ ಮಧ್ಯಪ್ರವೇಶ ಮಾಡಿರಲಿಲ್ಲ. ಮಕ್ಕಳಿಗೆ ಉತ್ತಮ ಶಿಕ್ಷಣ ದೊರೆಯಬೇಕು ಎಂಬುದೇ ಅವರ ಪ್ರಮುಖ ಕನಸಾಗಿತ್ತು. ಇಂದಿನ ಐಷಾರಾಮಿ ಜೀವನಶೈಲಿಯಿಂದ ಸಂಸ್ಕಾರಗಳು ನಶಿಸುತ್ತಿವೆ. ಆದರೆ ತಮ್ಮ ತಾಯಿ ಅತ್ಯಂತ ಸರಳ, ಮೌಲ್ಯಯುತ ಜೀವನ ನಡೆಸಿದ ಮಹಿಳೆಯಾಗಿದ್ದರು ಎಂದು ಅವರು ಅಭಿಪ್ರಾಯಪಟ್ಟರು.
ಹೊಳೆನರಸೀಪುರ ಭಾಗದ ಜನರಿಗೆ ಚೆನ್ನಮ್ಮ ಅವರ ಆತಿಥ್ಯ ಎಂದಿಗೂ ಮರೆಯಲಾಗದು. "ಚೆನ್ನಮ್ಮ ಅವರ ಕೈಯಲ್ಲಿ ಕಾಫಿ ಕುಡಿಯದಿದ್ದರೆ ಪಾಪಿಗಳು" ಎಂದು ಜನರು ಹೇಳುತ್ತಿದ್ದರು. ಮನೆಗೆ ಬಂದ ಪ್ರತಿಯೊಬ್ಬರನ್ನೂ ಆತ್ಮೀಯವಾಗಿ ಬರಮಾಡಿಕೊಳ್ಳುವ ಗುಣ ಅವರದ್ದಾಗಿತ್ತು ಎಂದು ಶೈಲಜಾ ಸ್ಮರಿಸಿದರು.
ದೇವೇಗೌಡ ಅವರು ವಿಪಕ್ಷ ನಾಯಕರಾಗಿದ್ದ ಸಮಯದಲ್ಲೂ ಚೆನ್ನಮ್ಮ ಅವರು ಕೃಷಿ ಕೆಲಸದಿಂದ ದೂರ ಉಳಿದಿರಲಿಲ್ಲ. ಹೊಲದಲ್ಲಿ ನಾಟಿ ಮಾಡುವ ಕೆಲಸವನ್ನು ಸ್ವತಃ ಮಾಡುತ್ತಿದ್ದರು. ದೇವೇಗೌಡ ಅವರು ಹುಡುಕಿಕೊಂಡು ಹೊಲಕ್ಕೆ ಹೋದಾಗಲೂ, "ನನ್ನ ಜಮೀನಿನಲ್ಲಿ ನಾನು ಕೆಲಸ ಮಾಡುವುದರಲ್ಲಿ ಏನಿದೆ?" ಎಂದು ಹೇಳಿ ಉತ್ಸಾಹದಿಂದ ಕೃಷಿ ಕಾರ್ಯದಲ್ಲಿ ತೊಡಗುತ್ತಿದ್ದರು ಎಂದು ಶೈಲಜಾ ತಿಳಿಸಿದರು.
ಕೃಷಿ ಕೆಲಸವನ್ನು ಎಂದಿಗೂ ಕೀಳಾಗಿ ಕಾಣದ, ಸರಳತೆ, ಪರಿಶ್ರಮ, ಕುಟುಂಬ ಮೌಲ್ಯಗಳು ಮತ್ತು ಆತಿಥ್ಯವನ್ನು ಬದುಕಿನ ತತ್ವವಾಗಿಸಿಕೊಂಡಿದ್ದ ಚೆನ್ನಮ್ಮ ಅವರಂತಹ ಮಹಿಳೆಯರನ್ನು ಇಂದಿನ ಸಮಾಜದಲ್ಲಿ ಕಾಣುವುದು ಅತ್ಯಂತ ಅಪರೂಪ ಎಂದು ಶೈಲಜಾ ಭಾವುಕರಾಗಿ ನುಡಿದರು.
